د افغانستان پخواني ولسمشر حامد کرزي د فبرورۍ ۱۱ نېټه د « ښځو او انجونو ته د علم لاسرسي نړیوالې ورځې » په تړاو ویلي، که پرمختللې ټولنه غواړو؛ نو د انجونو پر وړاندې د زده کړو بندې دروازې باید خلاصې شي. کرزي ویلي، په بېلا بېلو برخو کې د بشري ټولنې په وده او پرمختګ کې د ښځو او انجونو رول لوبول اړین دي او دا یواځې هغه وخت ممکن وي، چې ښځې او انجونې علم ته لاسرسی ولري. نوموړي په افغانستان کې د انجونو د زده کړو په پیل ټینګار کړی او زیاته کړې یې ده، که پرمختللې ټولنه غواړو؛ نو د انجونو پر وړاندې دې د ښوونځیو دروازې خلاصې شي.
